Muuna walilimo zemashumi aketalizho kasilisiñwi (51) nangile lieto la libima zefitelela sikiti kuzwa tolopo ya Gobabis mwasikiliti sa Omahele, kuliba Katima Mulilo mwasikiliti sa Zambezi, kuyo kunupa nyazi yahae nikuzwelapili kuikunupa yena muñi. Piho yasipokola ibulela kuli Fidelus Herold Auchaba nailo fita mwa Katima Mulilo Labubeli kakasasa kanako ya 05h00.
Baituti babafitelela sikiti kuzwelela mwalikolo zeshelanashelana mutulo wanaha Namibia, neba neuzi mali mwakalulo yapili ya unumwaha, ofesi yebona zaneulo yamali (NAMBTS) nepatuluzi viki yefelile.
Naha haitalimana ni lindinda leliñwi la butuku bwa Covid-19, baituti ba 129 nebaswalezwi butuku bwa Covid-19 viki yefelile, mi nombolo yeo itezwi kupahama.
Mapokola mwasikiliti sa Kavango ya Wiko nebatamile bashimani baketalizoho ni muchaha walilimo ze 21, kakukulubelwa kuli nebauzwize mikota yelishumi yabupi bwa mbonyi bwa kufepa baituti kwa sikolo sa Halili.
Mapokola nebatamile babanyazwa babalalu kakuloba mulao obona zamilyani wabu 13 wasilimo sa 2003, kasamulaho akufumaniwa ni mapilusi akusulula mulwalo.
Patisiso yene talima konahalo yakuyandulula nzila yasitima kuzwa Grootfontein kuliba Rundu ni Katima Mulilo, yene nyatezwi kililuko la linzila ni misebezi ifelile.
Katengo kakabona zakuyaha mikwakwa ili kakazibahala kaRoads Authority (RA), kalumela kuli kukwalulwa kwamukwakwa walibima zemashumi aketalizoho kazepeli, obizwa Brendan Simbwaye kikwabutokwa hahulu.
Kalulo yakubabaza pukelezo yalico mwalibaka zapabalelo yalifolofolo mwa Namibia, Zimbabwe ni Zambia nehatisizwe mwasikiliti sa Zambezi. Purojekiti ye ukamezwi kikatengo Namibia Nature Foundation NNF, nikusulelwa masheleñi kililuko la lipisinisi ni zwelopili kuzwelela naha Germany, ikasebeza hala kutisa mikwa yakumbweshafaza njimo.
Sikwata sabasundi kuzwelela sikiliti sa Zambezi, sibulela kuli sibaka sapabalelo yalifolofolo sa Bwabwata hasiswaneli kuswaliwa, ili kuli kalulo yabupoti ikole simbule sateñi.
Nihaike lipato zanaheñi lihapa maikuto, mupunga waKalimbeza ukataziwa kilinyunywani zeo kakuli lisinya mupunga osali omunyinyani. Mwangambolo ni New Era viki yefelile muzamaisi wasimu Patrick Kompeli nanitifalize lipato zanaheñi zenze tisa butata.